Stilistik Jaku Iban_TembawaiRanggil

Stilistik Jaku Iban

Mayuh bengkah difenisyen ti diberi ulih bala sid ti tebangkar ba apak lingusitik senentang stilistik. Leka jaku stilistik iya nya leka jaku ti berasal ari stylistics dalam jaku Inggeris. Lalu leka jaku nya nyadi asil ari gembar dua leka jaku iya nya style enggau ics. Stylist ngemai reti pengarang tauka orang ti bejaku ti ngembuan gaya jaku ti manah sereta perambu. Ics tauka ik iya nya penemu tauka pansik. Lalu stilistik iya nya lelemu penteba jaku.

Kamus Dewan (1996:1305) meri definisyen stilistik iya nya pansik senentang cahar ngena gaya jaku enggau engkeman dalam pengawa ngarang lalu bekaul enggau stail. Bepelasarka Kamus Lingusitik (1982:159) ti dikarang Kridalaksana madahka stilistik tu iya nya lelemu ti mansik jaku ti dikena dalam asil tengkebang; penemu interdisplin antara linguistik enggau kesusasteraan. Kelimpah nya, iya mega madahka penerapan lingusitik dalam pansik gaya jaku. Sastrawan negara Keris Mas dalam Perbincangan Gaya Bahasa Sastra, DewaN Bahasa dan Pustaka, Kuala Lumpur (1988:8) mega madahka stilistik tu iya nya enda lari ari pansik senentang gaya dikena meri nilai enggau ngulihka pemereti ti bendar senentang sesebengkah karang tauka teks kesusastraan.

Bepelasarka penemu di atas nya tadi, ulih disimpulka kitai stilistik tu iya nya penemu interdisiplin lingusitik enggau sastra. Kelimpah ari nya, stilistik tu mega penemu senentang cahar bekenaka jaku dalam karang sastra kelimpah ari penemu gaya jaku ti dikena dalam wachana sastra. Kepenudi iya, stilistik tu iya nya pansik senentang wachana sastra enggau orientsyen linguistik.

Penteba ti beguna dalam stilistik iya nya manah sereta gramatis. Penteba nya mandangka pengelandikpengarang ti ngasilka karang sastra bepelasarka gaya jaku enggau stail iya empu. Kelimpah nya, stilistik jaku mega ngembuan penteba nilai estatika. Enti dipeda ari sukut sastera, stilistik mansik kesemua karang enggau ngemasukka penemu pansik lingusitik dalam ngena jaku. Austin Warren 1966 madahka stilistik ngembuan tuju nyerenih cahar bekenaka jaku ti lari ari norma awakka tetemuka nilai estatik dalam karang.

Bisi dua bengkah strategi dalam teori stilistik iya nya elemen skema enggau majaz. Elemen skema tu deka dibagi ngagai empat chabang lalau lima chabang bagi elemen majaz. Skema ti keterubah iya nya skema ti seimbang. Skema ti seimbang iya nya ubah tukuh tauka tusun leka jaku sechara seimbang ti ngasilka empas reti ti bebida. Ngambika banding, paralelisme, antitesis enggau isokolon dikena dalam skema ti seimbang. Skema ti kedua iya nya skema betandu. Skema betandu iya nya nandu leka jaku tauka frasa ti ngasilka empas munyi enggau serengut ti puitis, beenteli sereta gramatis. Elemen anafora, epistrop, anadiplosis, poliptoton, epanalepsis, klimaks, antimetabale, asonansi, kiasmus enggau aliterasi dikena dalam ngasilka skema betandu. Skema ti ketiga iya nya skema ningkil. Skema tu meri empas penyelai enggau pemayuh gaya jaku. Elemen ti dikena dalam sekma tu iya nya elpsis, asindeton enggau polisindeton. Skema ti keempat iya nya skema ragaman. 

Semantik Jaku Iban : Reti Leksikal & Reti Ayat_TembawaiRanggil

Reti Leksikal & Reti Ayat

Reti leksikal iya nya reti ti bisi dalam diksionari tauka reti leka jaku ti enda disengkaum ari kaul enggau leka jaku ti bukai dalam ayat. Ngambika chunto, leka jaku peda, bepeda, meda, tepedaka enggau dipeda ngembuan reti leksikal laban reti leka jaku nya ulih dipeda kitai dalam diksionari. Rurun urup di+, be+, me+, te+...+ka enda ngembuan reti leksikal tang ngembuan reti gramatis.

Nitihka Adullah Hassan (1989) ba bup Linguistik Am untuk Guru Bahasa Malaysia, reti leksikal ulih dibagi ngagai beberapa apak iya nya sinonim, antonim, polisem, homonim enggau hiponim. Sinonim iya nya leka jaku ti ngembuan reti ti sama. Sinonim bisi beberapa bengkah iya nya sinonim pinjau,sinonim konteks, sinonim lebas sosial enggau sinonim kolokasyen. Antonim iya nya reti belaban antara leka jaku dalam sesebengkah jaku. Leka jaku ti ngembuan reti ti belaban suah agi ngembuan tipak. Bisi tiga bengkah bansa antonim iya nya antonim tipak komplemen, antonim kaul tikas tauka darjah enggau antonim kaul belaban (bertentangan).  Polisem iya nya siti leka jaku ti ngmebuan mayuh reti. Ngambika banding, leka jaku telu. Mayuh bengkah bansa telu sekalika telu manuk, telu serati, telu lelabi tauka telu tichak. Nangkan ke nya, himonim ti ngemai reti leka jaku ti ngembuan sebut tauka sepil ti sama tang ngembuan reti ti bebida. Ngambika banding dalam jaku Iban, leka jaku mata ti ngembuan reti empai mansau enggai perengka tubuh mensia. Kepenudi bendar iya nya hiponim ti ngemai reti beberapa reti leka jaku ti disengkaum dalam leka jaku ti bukai. Chunto, puyu, tilan, tuman, enseluai enggau banta tau disengkaumka kitai enggau leka jaku ti bukai iya nya ikan.

Reti ayat iya nya elemen ti beguna sekalika lebuh begunaka kena bekomunikasyen tauka ditulis. Semua utai ti disebut tauka ditulis enda ulih diperetika orang ti bejaku tauka macha enti elemen reti nadai. Semua jaku bepanggai ba reti dalam ayat enggau leka jaku. Leka jaku mesti ditusun enggau betul awakka reti ti deka dikenataika ulih datai enggau manah sereta ngembuan reti ti menyana. Taja pia, bisi leka jaku ngundan dua tauka tiga reti pia mega bisi leka jaku nadai ngundan reti ti menyana. Dalam konteks jaku, orang ti bejaku tauka nulis ngumbai orang ti ninga tauka macha meretika pekara ti deka dikenataika dataika orang ti nyebut tauka nulis ninggalka beberapa leka jaku dikena muntangka pekara ti disebut. Dalam jaku Iban, reti ayat ulih dibagi ngagai reti konotatif enggau reti denotatif ti ulih diperatika baka penerang ba fitur reti.

Taja pia, reti ayat ulih diperatika ari dua sukut iya nya sukut pengerembai reti enggau pengerupit reti leka jaku tauka ayat. Pengerembai reti ti nyengkaum sintaksisi enggau pragmatik bepelasarka Hashimah Jalaluddin (1992:1) ti ngambi penemu Sperber enggau Wilson (1980) ti madahka pansik reti bedau ulih diamatka sepenuh iya nitihka utai ti dikedeka bala sida ti bejaku. Pengerembai reti iya nya leka jaku tauka ayat ti ngundan mayuh agi reti kemaya ari tu enti dibandingka enggau reti leka jaku ti sama maya dulu kelia.

Pengeruyup reti iya nya leka jaku ti mula iya ngembuan reti ti besai tang diatu semina dikena ba reti ba sesebengkah pekara aja (Chaer,1995). Taja pia, Keraf (1986:97) madahka pengerupit leka jaku iya nya proses ubah reti  ari besai ngagai reti ti lebih spesifik agi. 

Semantik Jaku Iban : Fitur Reti_TembawaiRanggil

Fitur reti dalam jaku Iban ulih diperatika kitai ari tiga bengkah sukut iya nya tukuh reti, kelas reti enggau lewah dalam reti (Kamarudin Hj. Husin). Reti leka jaku tauka ayat ngembuan tukuh kediri empu iya nya betukuh dinamis iya nya reti ti ulih berubah-ubah enggau betukuh evolusyen iya nya ulih ngerembai.  Bisi beberapa penteba ti ngasuh jaku nya ulih berubah enggau ngerembai baka milih leka jaku, daya idup, konteks enggau reti dalam sempama. Kebuah leka jaku mesti dipilih awakka pekara ti deka dikenataika kitai ngembuan reti. Daya idup ngemai empas ti besai dalam ubah sesebenagkah jaku. Ngambika banding, leka jaku ti dikena dalam jaku Iban kurang amat dalam penemu Sains enggau Teknologi laban daya idup kitai enda bekabih enggau dunya bansa nya enti dibandingka enggau pengawa bumai, berimbaka kampung, miring enggau beramu laban asal kitai Iban endang iya ari nya. Ari sukut konteks, reti sesebengkah jaku bepanggai ba situasyen enggau geregayak ati orang ti ngenataika maya besebutka leka jaku. Kepenudi iya nya reti dalam sempama ti dikena ngembuan reti ti bebida ari reti asal ayat. Ngambika chunto, sempama baka buyah nabak ke diri ba api. Enti dipeda ari sukut denotasi, kitai meragamka sebansa burung ti nabakka ke diri ngagai apai lalu mati. Taja pia, laban ayat nya dikena dalam sempama, reti iya berubah nyadi nganjung diri ngagai pekara ti udah ditemu manah.  

Kelas reti ulih diperatika ari beberapa sukut baka sukut reti denotasi, konotasi, emotif, kognitif, refensial enggau reti piktorikal (F.R Palmer,Semantik). Reti denotasi iya nya reti leka jaku ti ulih dipeda dalam diksionari. Mega dikelala enggau reti leksikal enggau reti konseptual laban ulih ditemu tekala nya. Ngambika chunto, leka jaku manuk. Lebuh orang nyebut manuk, dia kitai lalu berundingka siku jelu ti ngembuan sayap, dua iti kaki lalu engkukuk. Kelimpah ari nya, kitai ngumbai leka jaku nya betul sereta ngena enti leka jaku nya suah dikena kitai enti dibandingka enggau konotasi ti ngembuan reti ti bukai sereta enda sama enggau reti asal leka jaku.

Reti konotasi iya nya reti bukai lalu enda sama enggau reti leka jaku ti disebut tauka ditulis. Ngambika banding,sempama baka pipit nelan buah embawang. Sempama ti baka tu ayan dalam komuniti bansa Iban laban ti deka mantaika sesebengkah pekara enggau reti ti bukai. Mayuh bengkah chara kitai Iban mantaika sesebengkah reti enggau konotasi baka bekenaka sempama, buah jaku enggau ti bukai dikena ngelalau orang ti dituju awakka orang ti mending jaku nya enda ensiban ati sereta nyima. Ngambika banding, pandak mulut engkerasak, panjai mulut kitai dikena ngelalau orang ti selalu betusika berita ti enda tentu pengamat iya.

Reti emotif iya nya reti ti ayan lebuh orang ti ditujuka enggau leka jaku nya mantaika emosyen iya sekalika emosyen positif tauka negatif (Mansoer Pateda,2001:101). Ngambika chunto, leka jaku babi dalam ayat ‘Nuan tu babi’. Jaku tu tentu enda manah didinga orang ti ditujuka. Kebuah iya pia laban babi dalam komuniti Iban ngayanka pemuruk ulah jelu nya lalu baka ke deka ngemelika siku-siku orang. Orang ti ditujuka jaku nya tadi tentu ensiban ati sereta berasai enda lantang sereta deka nyida laban disemaka orang baka babi. Chunto bukai baka, ‘Nuan baka Kumang’. Lebuh orang ti ditujuka ninga jaku nya, emosyen ti deka dibantaika iya tentu positif laban Kumang nya nunjukka orang ti bajik, bagas sereta landik ngereja pengawa ba rumah panjai.  Nya alai, jaku nya dikumbai reti emotif laban iya ulih ngasuh orang ti dituju tau mantaika emosyen lalu bisi bekaul enggau geregayak ati sekalika positif tauka negatif.

Reti kognitif iya nya reti ti ditunjukka ulih pikir runding sereta dampih enggau dunya luar tauka utai ti ngelingi kitai lalu ulih dipejuraika bepelasarka analisis komponen iya empu (Mansoer Padeta, 2001:109). Leka jaku rumah panjai ngembuan reti rumah ti betampung lebih ari siti. Reti refensial iya nya kaul antara elemen-elemen linguistik ti betukuh leka jaku, rambai jaku enggau peneleba nonlinguistik (Mansoer Padeta, 2001:125). Referen tu lebih agi ngagai utai ti nyadi, proses enggau dunya nyata. Kepenudi iya nya reti piktorikal. Piktorikal iya nya reti ti ayan empas ari leka jaku ti semina ayas ti empai nyengala ti didinga tauka dibacha. Ngambika banding, reti leka jaku but. Dia peninga tauka pemcaha deka meragam situasyen ti bebau sereta kamah.

Semantik Jaku Iban : Reti Semantik_TembawaiRanggil

Semantik iya nya bidang tauka apak ti mansik sereta nyerenih reti leka jaku enggau ayat dalam sesebengkah jaku. Leka jaku iya nya utai ke disebut tauka ditulis ti meras sereta ngembuan reti. Berasal ari leka jaku semantikos,siti jaku bansa Yunani ti ngemai reti pekara ti beguna tauka ngembuan reti. J.W.M. Verhar, 1996 dalam Semantik dan Pragmatik Bahasa Melayu madahka semantik iya nya chabang linguistik ti bejuraika senentang reti. Kelimpah nya, Abdul Chaer, 1994 mega madahka semantik iya nya bidang ti mansik reti jaku. Kamus Dewan mega bejuraika senentang semantik ti masik reti leka jaku enggau penambah reti sesebengka leka jaku. Sechara rama, semantik tu iya nya bidang penemu senentang reti tauka ubah reti dalam sesebengkah leka jaku. Sechara spesifik iya, semantik iya nya pansik senentang lambang-lambang tauka kelai ti mantaika reti, kaul antara reti enggau reti ti bukai sereta bakani reti tu bekaul enggau komuniti ti ngelingi.

Dipeda ari konsep, semantik berasal ari leka jaku adjektif bansa Yunani semantickos ti ngembuan reti beguna tauka ngembuan reti. Ferdinand de Saussure madahka semantik iya nya jaku ti dikena ngenataika reti. Buah runding Choamsky madahka semantik reti ayat ti ditentuka struktur pelasar enggau konteks lebuh ayat dikena. Taja pia, semantik ukai semina bepelasarka reti tang pengerembai reti ti disebut semantik sejarah (M.Breal,1893).

Kaul semantik enggau leka jaku ulih diperatika kitai ari sukut kaul reti enggau leka jaku sereta kaul reti enggau ayat. Beberapa terma ti dikena mantaika kaul ti rapat antara reti enggau leka jaku baka sinonim, antonim, homonim, homofon, homograf, hiponim, polisemi enggau metonim. Pia mega, bisi tiga bengkah bansa kaul semantik enggau ayat iya nya parafrasa, entailment enggau kontradiksyen.

Nyadika simpul, semantik iya nya sebagi ari linguistik ti mansik jaku enggau silik. Semantik ulih dipejuraika nyadi sebengkah bidang ti mansik leka jaku enggau ayat sesebengkah jaku. Pansik senentang reti leka jaku ulih dipeda ari aspek reti denotasi enggau konotasi, reti dalam konteks, kaul reti enggau daya idup, ubah reti enggau tukuh-tukuh reti ari kaul semantik.

Pengelandik Benilai Tambah: Belajar Chara Belajar/Pengelandik Berunding _ TembawaiRanggil